Xalqın milli kimliyini, tarixi yaddaşını və mənəvi bütövlüyünü yaşadan əsas dəyərlərdən biri həmrəylik və birlik ideyasıdır. Azərbaycan xalqının tarixində bu ideyanın ən parlaq və rəmzi təcəssümü 31 dekabr-Dünya Azərbaycanlılarının Həmrəyliyi Günüdür. Bu gün sadəcə təqvim bayramı deyil, əsrlər boyu parçalanmış bir millətin yenidən birliyə doğru atdığı iradəli və şüurlu addımın simvoludur.
Dünya Azərbaycanlılarının Həmrəyliyi Gününün tarixi əsası 1989-cu ilin sonlarında Naxçıvanda baş verən mühüm ictimai-siyasi hadisələrlə bağlıdır. SSRİ-İran sərhədləri boyunca çəkilmiş süni maneələrin xalq iradəsi ilə sökülməsi Şimali və Cənubi Azərbaycan arasında uzun illər kəsilmiş insani, mədəni və mənəvi bağların bərpasına real zəmin yaratdı. Araz çayı boyunca baş verən bu tarixi sərhəd yürüşləri təkcə fiziki baryerlərin deyil, eyni zamanda ideoloji və psixoloji sədlərin də dağıdılması idi.
Sərhədlərin sökülməsi ilə azərbaycanlılar bir daha sübut etdilər ki, coğrafi ayrılıq milli yaddaşı və mənəvi bütövlüyü məhv edə bilməmişdir. Bu ümumxalq hərəkatı imperiya düşüncəsi tərəfindən müxtəlif təzyiq və repressiyalarla qarşılaşsa da, xalqın birləşmək iradəsi sarsıdılmadı. Əksinə, proses getdikcə beynəlxalq miqyas aldı və dünyanın müxtəlif ölkələrində yaşayan azərbaycanlıların diqqətini vahid milli ideya ətrafında cəmləşdirdi.
Bu tarixi hadisələrə hüquqi-siyasi qiymətin verilməsi 1991-ci il dekabrın 16-da Naxçıvan Muxtar Respublikası Ali Məclisinin sədri Heydər Əliyevin təşəbbüsü ilə mümkün oldu. Onun imzaladığı qərarla 31 dekabr Dünya Azərbaycanlılarının Həmrəyliyi Günü elan edildi. Bu addım milli birliyin dövlət səviyyəsində tanınmasının və qorunmasının bariz nümunəsi idi.
Bu gün 31 dekabr dünyanın 70-dən artıq ölkəsində yaşayan azərbaycanlılar tərəfindən böyük coşqu ilə qeyd olunur. Həmrəylik Günü Azərbaycan diasporunun milli kimliyini qoruyub saxlamasında, tarixi Vətənlə mənəvi bağların möhkəmləndirilməsində mühüm rol oynayır. Müxtəlif səbəblərdən doğma yurdundan uzaqda yaşayan soydaşlarımız üçün bu gün milli yaddaşın, mənsubiyyət hissinin və bərabərliyin rəmzinə çevrilmişdir.
Dünya Azərbaycanlılarının Həmrəyliyi Günü milli birliyin, bərabərliyin və ortaq gələcəyə inamın simvolu kimi Azərbaycan xalqının tarixi taleyində xüsusi yer tutur. Bu gün keçmişin ağrılarını xatırlatmaqla yanaşı, gələcəkdə daha güclü, daha bütöv Azərbaycan naminə birləşməyin vacibliyini ifadə edən mənəvi bir çağırışdır.
Rəvanə Kərimova,
Nəsimi Rayon Gənci
